【JARvelogue周遊學・朱印帳日文及小知識】
早兩日有朋友問關於日本神社／佛寺嘅朱印問題，今次就一次過分享朱印嘅日文同小知識啦！
首先，朱印（しゅいん／shu-in），又名御朱印（ごしゅいん／go-shu-in），係日本神社／佛寺提供嘅一個參拜證明。原先係要參拜者抄寫經文同對神明有一定理解後，先可以獲取嘅憑證，而家演變成參拜之後，供奉少量嘅錢（大約300円）就可以得到嘅參拜憑證。
朱印主要包括神社／佛寺嘅印、名、同參拜日期。某啲神社／佛寺更會因應唔同季節、節日、特別活動而授予唔同顏色嘅朱印。一般黎講，神社嘅朱印較為簡樸；佛寺嘅內容則較為豐富。
講到求朱印要注意嘅事項，通常有以下幾點：
1️⃣朱印係一定要印喺朱印帳上，唔可以求其拎本簿或者拎張紙去印。
2️⃣有少部份神社／佛寺唔希望喺同一本朱印帳上，會同時出現神社同佛寺嘅朱印。所以最好係事前準備好兩本。一本神社用、一本佛寺用。
3️⃣朱印一定一定要喺參拜之後先可以得到。喺參拜後，準備好零錢，預先揭好想要印嘅空白頁面就可以。
4️⃣朱印係一個參拜憑證，所以唔可以轉賣、代領、或者當手信咁送俾人。
至於想請人幫忙寫朱印日文應該點講呢？只要講「御朱印をお願いします。」（ごしゅいんをおねがいします／go-shu-in wo o-ne-ga-i-shi-ma-su）就可以喇。呢句直譯即係「麻煩要御朱印」嘅意思。仲要記住喺對方寫完，接過朱印時，要回返句「ありがとうございます。」（a-ri-ga-to-u-go-za-i-ma-su）唔該人呀！
順帶一提，朱印帳喺市面嘅文具店已經買得到。如果參拜一刻先發現唔記得帶朱印帳，有啲神社都會提供已寫好喺紙上嘅朱印，等你可以貼返落朱印帳度。又或者即場喺神社／佛寺買本新嘅（多數嘅神社／佛寺都有得賣，而且仲係佢地嘅特別版朱印帳添！）。收集朱印，雖然聽落好似好多規矩，但其實一啲都唔複雜，第時可以再去旅行果陣，睇吓你又有冇興趣展開呢條收集朱印之路啦！
#JARvelogue
#日本冷知識
#周遊學
#解答問題時間
#周奕瑋的旅人視角
#都係嗰句
#圖文不符
Search